هئچ نیفرینین یئری دیر؟!

دوکتور جئری 

     شئیخیمیز آغ مندیلینی اوزونه باساراق هؤنکور- هؤنکور آغلادی. بورونون چکیشی نئچه کره بلندگودا یانقیلاندی:

- نیفرین اولسون سنه ائی آل سعود..

جاماعات سس سسه وئره‌رک قیشقیردی:

- نیفرین!

شئیخیمیز ایچینی چکدی:

- نیفرین اولسون سنه ائی آل سعود.. نئجه قییدین او بؤیوکلوکلده عالیمی، شئیخلرین شئیخینی اؤلدوره‌سن؟!...

جاماعات یئنه قیشقیردی:

- نیفرین!

- ائی قان تؤکن آل سعود، شئیخین گوناهی اولموش اولسایدی دا، نییه آجیماسیزجاسینا بوینونو ووردون؟... ائله‌یه بیلمزدین ائوینده دوستاق ائده‌سن؟! ائله‌یه بیلمزدین برقینی، سویونو، گازینی، تئلفونونو کسه‌سن، ائوی‌نین قاباغینادا بیر گؤزتچی قویاسان باییرا چیخماسین، اؤز اجلی ایله اؤلسون؟!....

- نیفرین!

قهر شئخیمیزین بوغازینی توتدو:

- ائی آللاهدان خبرسیز آل سعود!.. ایندیکی شئیخی اؤلدوروبسن... نییه جنازه‌سینی تحویل وئرمیرسن؟...

مینبرین قاباغیندا اوتورموش قلئیچی مورتوض دوشونجه‌یه دالدی:

- کئشکه شئیخین جنازه‌سینی بیزه تحویل وئره‌لر!... اوندا بیزیمده  ایمامزادامیز اولار.... اوندا مجبور اولماریق محرملیکده یوخاری ترس‌آوانین ایمامزاداسینا گئده‌ک..آلچاق یوخاریلار ایله اوز- اوزه، گؤز- گؤزه گلک... دیلسیز، آغیزسیز پوللاری اونلارین جیبنه تؤکک... آخخخ.. بیزیمده ایمامزادامیز اولسایدی نه اولاردی؟!... آللاه لعنت ائله‌سین آل سعودا؛ گؤره‌سن شئیخین جنازه‌سی‌نین هاردا قویلاییب؟!..

آل سعودون آدی قلئیچی مورتوضون خیالینا گیرینجه بیردن آیاغا قالخیب اوجا سسله قیشقیردی:

- نیفرین‌!

جاماعات بیر بیری‌نین اوزونه باخدی. کیمیلری‌نین دوداغی قاچدی. قلئیچی مورتوض شیرین خیاللارا دالاندان یاریم ساعات اولاردی شئیخیمیز سئچکیلره گؤره دانیشیردی. شئیخیمیز أیری-  أیری قلئیچی مورتوضا باخیب دئیندی:

- هئچ نیفرینین یئری دیر؟!

Heç nifrinin yeridir?!

Dr.Jery

    Şeyximiz ağ məndilini üzünə basaraq hönkür- hönkür ağladı. burunun çəkişi neçə kərə büləndquda yanqılandı:

- Nifrin olsun sənə ey Ale-səud..

    Camaat səs səsə verərək qışqırdı:

- Nifrin!

    Şeyximiz içini çəkdi:

- Nifrin olsun sənə ey Ale-səud… necə qıydın o böyüklükdə alimi, şeyxlərin şeyxini öldürəsən?!...

    Camaat yenə qışqırdı:

- Nifrin!

- Ey qantökən Ale-səud, şeyxin günahı olmuş olsaydı da, niyə acımasızcasına boynunu vurdun?... eləyə bilməzdin evində dustaq edəsən?! eləyə bilməzdin bərqini, suyunu, qazını, telfonunu kəsəsən, evinin qabağınada bir gözətçi qoyasan bayıra çıxmasın, öz əcəli ilə ölsün?!....

- Nifrin!

    Qəhr şeximizin buğazını tutdu:

- Ey Allahdan xəbərsiz Ale-səud!.. indiki şeyxi öldürübsən... niyə cənazəsini təhvil vermirsən?...

    Minbərin qabağında oturmuş Qəleyçi murtuz düşüncəyə daldı:

- Keşkə şeyxin cənazəsini bizə təhvil verələr!... onda bizimdə imamzadamız olar.... onda məcbur olmarıq məhərrəmlikdə yuxarı Tərsavanın imamzadasına gedək..alçaq yuxarılar ilə üz- üzə, göz- gözə gələk... dilsiz, ağızsız pulları onların cibinə tökək... axxx.. bizimdə imamzadamız olsaydı nə olardı?!... Allah lənət eləsin Ale-səuda; görəsən şeyxin cənazəsinin harda quylayıb?!..

    Ale-səudun adı Qəleyçi murtuzun xəyalına girincə birdən ayağa qalxıb uca səslə qışqırdı:

- Nifrin!

    Camaat bir birinin üzünə baxdı. Kimilərinin dodağı qaçdı. Qəleyçi murtuz şirin xəyallara dalandan yarım saat olardı şeximiz seçkilərə görə danışırdı. Şeyximiz əyri- əyri Qəleyçi murtuza baxıb deyindi:

- Heç nifrinin yeridir?!